Fellsmörk Jæja, hvað gat ég persónulega gert? Svarið var af sjálfsögðu að byrja sjálfur með skógrækt á Íslandi. Auðvitað getur einn maður ekki reddað því sem margar kynslóðir eyðilögðu. En ég gat jú að minnsta kosti byrjað. Og það gerði ég líka. Fyrstu trén mín á Íslandi gróðursetti ég í Munaðarnesi í Borgarfirði. Verkalýðsfélagið hafði leitað af sjálfboðaliðum sem vildu hjálpa að gróðursetja í sumarbústaðaland þeirra. Það var mjög skemmtilegt að vinna í 15-20 manna hópi sem hafði sama áhugamálið. Og um kvöldið var auðvitað haldið veisla. Þetta hlýtur að hafa verið árið 1985. Ég fór ekki bara í þetta eina skipti, heldur oft á næstu árum. Og þessi fyrstu trén hafa vaxið heldur betur síðan.
En þetta var bara byrjunin. Árið 1991 fréttum við frá kunningjum okkar Hennýju og Nonna að þau væru að rækta skóg á vegum Skógræktarfélags Reykjavíkur rétt við Pétursey. Við heimsóttum þau þangað og vorum yfir okkur hrifin. Það tók okkur að vísu yfir 2 1/2 tíma að keyra í Fellsmörkina (en svo heitir svæðið) en landið sjálft minnti óneitanlega á Þórsmörk og var mjög villt og fallegt. Okkur var sagt að það væri enn hægt að fá lóð og við ákváfum strax að slá til, gera leigusamning og byrja að rækta. Maður mátti líka setja upp sumarbústað þar ef áhugi var fyrir hendi. En ókostirinn var að þetta var leigulóð og leigutími var takmarkaður á 25 ár. Eftir það átti íslenska ríkið að fá skóginn, en við máttum halda eftir hálfum hektara í kringum tilvonandi bústað. En hvað með það, eru 25 ár ekki nóg langur tími?
Næstu árin í Fellsmörkinni voru mjög lærdómsrík. Og þú getur ímyndað þér, hvað ég á við: Eftir tveggja ára erfiðisvinnu var árangurinn hræðilegur og niðurdrepandi fyrir áhugasama skógræktarmanninn. Vetrarstormarnir höfðu skrælt og eyðilagt allt sem búið var að gróðursetja. Maður einfaldlega fann ekki trén aftur næsta vor. Mikilvægasti lærdómurinn, sem maður dró af þessu var: Það vantar skjól. Og hvernig var best að fá skjól? Við reyndum ýmislegt: Við settum striga utan um trén eða settum plastflöskur yfir þau, en best reyndust vörubrettin. Þau voru fest saman og sett upp til að mynda samliggjandi skjólvegg.
Svona leit landið út í byrjun.
Bretti mynda skjól.
Það myndi taka of langan tíma að segja frá öllu sem gerðist í Fellsmörk á árunum 1992 til 2017, þ.e. á 25 árum, síðan við byrjuðum í skógrækt þar. Þess vegna koma hérna nokkrar myndir, nokkurn veginn í tímaröð. Með því að smella á myndina hér að neðan opnast myndasíða.